வசிஷ்ட மகரிஷி, மிகவும் போற்றி வணங்கப்படும், ரிக் வேத காலத்தைச் சேர்ந்த மகரிஷியாவார். பிரம்மாவின் மானச புத்திரர்களில் (பிரம்மாவின் மனதிலிருந்து தோன்றிய புதல்வர்களில்) ஒருவராதலால், வசிஷ்ட மகரிஷி பிறப்பிலேயே பிரம்மரிஷியாவார். இவர் தசரத மன்னரின் குல குருவாகவும், ஸ்ரீ ராமரின் குருவாகவும் அறியப்படுகிறார். இவர், தற்போதைய மன்வந்தரத்தின் சப்தரிஷிகளில் ஒருவராவார். சப்தரிஷிகளின் குழுமத்தில் இவர் குலபதி வசிஷ்டர் என அழைக்கப்படுகிறார்.

அழியாப்புகழும், அளப்பரிய ஆற்றலும் கொண்டவராயினும் இவர் பணிவே உருவானவர். இவரது பணிகள் எப்பொழுதும் இரகசியமானவை. இவர் தனது சாதனைகளை ஒருபொழுதும் பறைசாற்றிக் கொள்வதில்லை. வசிஷ்ட மகரிஷியின் சீடராவதும், சீடராகத் தொடர்ந்து நிலைத்திருப்பதும் அவ்வளவு எளிதல்ல.

வசிஷ்ட மகரிஷி, சத்ய லோகத்தில் வசிக்கிறார். நமது பூமியில் இவரது இருப்பிடம், அபு மலையில் உள்ளது. இவர் சப்தரிஷி மண்டலத்தின் தலைமை ரிஷியாவார். இவர், விஷ்வாமித்ர மகரிஷி, அத்ரி மகரிஷி, மார்க்கண்டேய மகரிஷி மற்றும் சில ரிஷிகளுடன் இணைந்து, முக்கியச் சந்தர்ப்பங்களில் தெய்வீக யாகங்களை நடத்தும் முதன்மை ரிஷியாவார். வசிஷ்ட மகரிஷியும் அவரது துணைவியார் மாதா அருந்ததி தேவியும் ரிஷிகேஷுக்கு வெளியே அமைந்துள்ள கங்கைக் கரையில் உள்ள வசிஷ்ட குகையில், நூறு ஆண்டுகள் தவம் இயற்றி உள்ளார்கள்.